Gedichte

Heitere und nachdenkliche Gedichte aus eigener Feder musikalisch begleitet und untermalt von Leo Muckenthaler und Julia Gehr (Gesang).

Wos hama mir zum sog´n?

S´Lebn is wunderschee, wenn ma se selber mog und de andan.

Hier ein kleines "Geschenk" für euch.
Ein Vorgeschmack was Euch bei einer gebuchten Gedichtelesung erwarten würde:

Leid, seids gscheid!

Liabe Leid, seids gscheid!
Halts wieder zamm!
Fangts eitz glei damit an!
Jeder is der, der er is,
und koana hod immer Recht.
Für nermds is af dera Welt a Sonderplotz bstellt.
Geld regiert die Welt
und jeder Kopf hod sein eignen Geist.
Irgendwann is jeder dran.
Ruck zuck brauchst an andern dann.
Du brauchst vielleicht sei Bluad,
sein speziellen Rat oder sei durchgreifende Tat.
Do frogst Du dann ned lang, wos er verdient,
oder wia nan sei neis Auto in d´Orbat bimmt.
Redts midanand!
Schauts ehng oo!
Weil irgendwann is jeder fürn andern dro.
Schenkts dem Neid koa Zeit.
Leid, halts wieder zamm!
Fangts eitz glei für ewig damit an!

Glick ghabt?

Mi hod koa Auto überfohrn
I ho zwoa gsunde Kinder geborn
I bin gsund und voller Freid
Ho mei Orbat
Ho mei Zeit
Bin in Bayern worn
Hob nermds in am Kriag valorn
Mei Bauch is voll
Mei Stubn is worm
Nermds verjogt mi vo meim Dahoam
Wia waars – waar i in Syrien geborn?

Neie Gedanken

Neie Gedanken san geborn,
alte Ängste gstorbn,
neie Träume am Entstehn, de altn am Vergehn.
Du tauschst de oane gega de andre Last,
weils schwerelos koa Mensch ned schafft.
Oa Ziel is erreicht, des nächste scho in deim Kopf drin kreist.
Alles is am Bewegn , immer wieder nei Entstehn.
Manchmal mecht ma bleibn,
in da guatn altn Zeit verweiln.
Doch ma muaß weidageh,
sunst waar vielleicht s´Scheenste nimmer schee.
Morgn wirds wieder anders sei
und übermorgn – ja mei!
Wer woaß, wos kimmt, wer woaß, wos wird?
Drum machs am besten wia da Hirt.
Leb mit allem, wos do kimmt,
bleib Dir selber nah und werd da über Deine wahren Schätze klar!